良驥避熊英雄順利補中

猪拉多纳

擒日頭場新馬賽，「良驥」先拔頭籌，胡森話呢匹馬刻意留待今次增程補中，無非都係為咗上次直路賽避開風頭躉「熊英雄」，不過「良驥」孭129磅，全程外疊望空亦勝，證明本身質素都好高，但係贏完下次要加磅，質新分子來日方長，所以胡森決定安排「良驥」提早抖暑，留待下季再作部署。
       

而「良驥」勝出對於馬主梁偉林嚟講亦別具意義，佢個人名義原來已經十年無拉頭馬，對上一次已經係01年6月嘅「祥昇」，所以呢場溫拿可以講係名副其實久違了的頭馬。據梁偉林表示，呢匹英國PPG係由相熟馬販，即前澳門練馬師張光明購入，拍板前最後二揀一，結果佢就揀咗「良驥」，不過梁偉林放棄嗰一匹依家喺英國跑，表現亦唔差，已經有頭馬交出，證明呢位馬販相當有眼光。