紅魔奇招爭盃算死巴塞

港陌

28/05/2011
文： 阿占

辛苦成季，巴塞隆拿同曼聯兩大班霸終極目標就係今晚溫布萊上演嘅「歐聯夢幻決賽」。兩年前巴塞贏曼聯捧盃，不過領隊費格遜吸取過上次教訓後，呢2年不斷刮料諗計點贏巴塞，今晚復仇之戰必奇招盡出，阿占睇好曼聯今晚成功捧盃，捧1.85倍「讓球客勝」！（有線61、64、201及203、中央5台周日凌晨2:45直播）




曼聯今屆歐聯晉級過程好有說服力，4強排後備陣都大炒史浩克，而且6場作客賽事5勝1和一球不失。如果世上真係無人可以單人匹馬去盯死美斯嘅話，雲達沙、里奧費迪南同尼曼查維迪呢個鐵三角就最有機會圍死巴塞條鋒線嘞。反而朗尼、查維亞靴南迪斯面對巴塞條唔係咁強嘅防線，搵食難度重無咁高添！


星仔費查「委以重任」


費爵爺為咗對付巴塞兩年前已經開始收料，處心積慮計好數今晚極可能搵「長氣袋」朴智星全場緊貼美斯，中場亦會由防守專家費查破壞沙維同恩尼斯達嘅組織，阻截巴塞進攻踢法。




相比之下，巴塞一直用佢哋最擅長嘅進攻戰略制敵，無論對手係弱旅定係皇馬都踢法不變，但呢場決賽對手係來勢洶洶嘅曼聯，巴塞若然要變，突然間又變唔變得掂呢？




巴塞靠一招打天下




你就擺明一招打天下，曼聯就針對性出擊，點計都係紅魔着數啲。何況巴塞左閘艾比度未必踢得，會由佩奧爾客串，中堅就搵馬斯真蘭奴頂上，呢個潛在漏洞隨時係呢場大戰嘅勝負分野呀！

紅魔防守No.1

‧近3次交手皆開出入球細。

‧此前曾4次打入決賽，成績為3勝1負。

‧此前11支於自己國家踢歐聯決賽嘅球隊，有7支能成功奪冠。

‧近5場歐聯比賽全部勝出，當中場均攻入2.2球。

‧今屆於歐聯只失過4球，場均僅失0.33球，為今屆最少嘅一隊。

巴塞歐聯連開3場細

‧史上10次交手3勝4和3負打成均勢。

‧此前曾6次打入決賽，成績為3勝3負。

‧27次作客英格蘭球隊錄得6勝8和13負。

‧今屆於聯賽場均被侵犯16.25次，為今屆最多嘅一隊。

‧近3場歐聯皆開出入球細。

歐聯決賽賽制

歐聯決賽以一場定勝負，90分鐘賽和需加時30分鐘，再和則以互射12碼決勝負。

近5屆決賽戰果

09/10‧國米（意） 2:0 拜仁（德）

08/09‧巴塞（西） 2:0 曼聯（英）

07/08‧曼聯（英） 1:1 車路士（英）加時後1:1，12碼曼贏6:5

06/07‧AC（意） 2:1 利物浦（英）

05/06‧巴塞（西） 2:1 阿仙奴（英）

頂占筍盤

曼聯

讓球客勝

有線球彩台主持阿占‧電郵：[email protected]

PHONE波熱線：1831678‧「歐聯戰略館」開放時間：周六晚11:00至周日凌晨0:00