紅魔登基普細歡騰

港陌

14/05/2011
文： 阿占

曼聯登基就喺今晚！追英超呢齣長篇劇追咗接近九個月，大家今晚極大機會可以見證傳奇一刻，曼聯作客布力般只要唔輸就可以贏得第19次頂級聯賽冠軍，雖然好多球迷都想曼聯贏番場轟轟烈烈封王，不過紅魔作客麻麻，而且要準備歐聯決賽撼巴塞，絕對唔會亂搏，捧1.82倍入球細最穩陣。（有線201及301、廣東體育周六晚7:45直播）




依家曼聯同利物浦都贏過18次聯賽冠軍，並列英格蘭之冠，不過「紅魔」今晚只要搶到1分，就會成為英格蘭史上獨一無二、最成功嘅球會！事實上，已經袋咗大半隻英超冠軍獎盃落袋嘅曼聯，自擊敗車仔嗰晚起，肯定已將目標直指歐聯決賽，一於做埋「歐聯英超雙冠王」先至夠巴閉。


曼聯坐定粒六派副選


以投X角度去睇，正正因為曼聯已穩奪英超冠軍，加上佢哋要搏歐聯、向巴塞復仇，所以今晚好大機會保留實力，據聞路爾斯華倫西亞、奧巴坦同布朗等今季上陣唔夠10場嘅球員，今晚都有機會再披戰衣，既然曼聯都已經坐定粒六，就算守和捧盃都唔介意。好簡單，大家睇番同「畸士」嘅西甲巴塞，作客利雲特咪又係和波捧盃囉！所以，想捧紅魔嘅朋友，真係要小心喇。


布力般未上岸以守為攻


人哋曼聯呢邊廂咁高興，難為布力般流浪家陣仲係相當閉翳，要為護級搏命。但好老實，布力般自己知自己事，相信今仗點都唔敢立亂搶攻，咪忘記布力般中場大將鄧尼、安祖斯同格拿都有傷在身，即使想攻都有心冇力，務求死守搶番1分就心滿意足喇。最重要嘅，係布力般近6場聯賽都開入球細，有條好路怕咩再跟先？


布力般連開6口細


‧近6場比賽均開出入球細。




‧連續4場比賽保持半場不失。

曼聯近戰少失波

‧連續2場作客聯賽不勝兼冇波入。

‧近5場聯賽皆保持半場不失。

頂占筍盤

布力般流浪

入球細

有線球彩台主持阿占‧電郵[email protected]

PHONE波熱線：1831 678‧「球彩俱樂部」開放時間：周六晚9:00至周日凌晨0:00