岳禮華好頭好尾

猪拉多纳

澳洲猛將岳禮華早排打吡賽日嚟客串，靠「傾力之城」食尾胡，上周冠軍一哩賽又嚟跑一日，到咗尋日佢騎「西國浪人」跑女皇盃，又可以跑多日，而佢亦相當好運，先靠後備補出嘅「驌龍」食頭胡，到尾場再贏後備二補出的「步步快」，起個後備馬孖寶，彌補番上個禮拜一騎「步步穩」犯規停賽三日嘅損失。
       
驌龍初出即勝，潛力甚高。
驌龍閘前落飛得手

其中由蔡約翰訓練嘅「驌龍」，尋日初次上陣原本票數都唔算硬淨，但閘前突然落到6.8倍着啡格，結果飛到馬到，輕勝個幾馬位。賽後馬主劉業強話以前古代有一隻馬叫做驌驦，出名跑得快，所以佢就將自己隻馬叫做「驌龍」，劉生話愛駒係佢親自揀番嚟，質素唔差，但都仲係生啲，今場嘅走勢就幾唔規矩，劉生仲話「驌龍」唔係千二米馬，遲啲要跑千六先合腳法。