熊英雄贏今季首場新馬賽

魑魅魍魉

新馬正式登場，結果由霍利時訓練之大熱門「熊英雄」先拔頭籌，並為馬主范邦初帶嚟久違咗兩年嘅頭馬。
       
熊英雄以56.71快時間大勝對手。

雖然「熊英雄」今場首捷贏得輕鬆，但賽後范邦初亦話相當緊張，畢竟自己已經闊別凱旋門好耐日子，所以愛駒未係正式過終點，佢都話唔敢放心篤定拉頭馬。對於新馬賽嘅賽期編排，范邦初亦話感到無奈，因為「熊英雄」響去年十二月底已運港，希望可以及早操起爭取一出即勝，可惜賽期一再延後，起初佢原本諗過引入一匹可以編插四班起步嘅PPG，但因為過往佢隻「熊中雄」響新馬賽贏過頭馬，正所謂食髓知味，所以佢就委託相熟馬販響前年嘅神奇百萬拍賣會入貨，結果第一匹出價就投到呢匹心頭好。
       

范邦初笑言希望下一場新馬賽可以順利如期舉行，因為尋日佢位「拍乸」莫慶雄醫生身在外地無入場，所以佢話下次最好畀佢哋三位馬主齊齊影番張威水相補番數。