高清睇跑馬：駕世仔梅開二度

港陌

　　第六場四班1650米，「駕世仔」三次上名全在此程，總場次318僅敗給三班照贏的「可愛人生」獲亞軍，前仗總場次419則輸在澤仔論盡，直路初諗住沿欄殺上，卻為馬所阻，被迫走番外叠蝕位，最後遲遲望空後追不及得第三。練者汲取教訓兼心急建功，上仗總場次452易配柏寶搏殺。雖然此馬走規依然未順，情縮欠缺穩定，大半程紮紮跳，入直路初衝刺亦未算太勁，但幸好柏寶騎功夠硬淨，大鞭大鞭扣殺，終於喚醒牠的競賽意欲，爆出強勁衝刺力，贏馬姿態吸引不在話下，在負重磅的情況下輕取再出補中的「精密紡」，水準之高有目共睹，質新馬一經開竅有望扶搖直上，今次能夠繼續於四班作賽賺盡形勢，梅開二度冇問題。

御龍神駒質新可贏

　　第二場四班1200米，「御龍神駒」一早開操試過谷閘，上仗初出本已留意，點知排十二檔兼配手風不太順的梁明偉，缺點多多當然忍手，結果佢冇W 亦冇P，冇買當然冇損失，不過再三睇番走勢，足以證明冇走漏眼，該仗騎師因應外檔起步選擇留前鬥後，揀內欄衝，誰知撞正場地不利後追，極度劣勢下，牠仍跑得一席殿軍，或者有人會話佢輸四個身位全冇威脅，但該役頭馬「田園名駒」大勝，表現驚人，「御龍神駒」實則只輸畀亞軍不足兩個身位，別忘記亞季軍「清脆利落」同「勁闖駒」再出繼續有好表現，前駒影相不敵再出入位「宇宙良駒」，「勁闖駒」轉戰田草贏馬補中，賽事水準高得緊要，加上質新馬有進步空間，絕對有信心捧W。

Sam