星運俊爵未夠數

猪拉多纳

方嘉柏馬房嗰隻「星運俊爵」，上鋪喺一千米直路賽大熱倒灶，今次轉跑田草千二米兼換柏寶，依然捧成大熱，不過，呢隻馬今次就不負眾望，順利補中。
       
星運俊爵初配柏寶大熱取勝。
身價480萬有排追

如果馬迷唔善忘嘅話，應該記得「星運俊爵」係馬主游紹賢用咗480萬喺香港國際馬匹拍賣會投番嚟，而喺拍賣嗰日，游生仲唔小心炒咗自己架身價不菲嘅座駕「幽靈之子」添。難怪賽後小方講笑咁話，連埋今場「星運俊爵」只係攞咗八十萬獎金，有排先可以補番個馬價。至於「星運俊爵」嘅前景點，小方就話呢隻馬本身跑轉彎路程好啲，依家先開始進步，日後應該有一番功業。