馬主論戰

魑魅魍魉

佳同試準開勝門

　　我剛啱先響新加坡返港，今次之行係恒基兆業請旗下一班員工去玩，我亦有份同行，響度要講一聲多謝。恒基老闆對一班員工真係好照顧，旅遊期間嘅飲食同招待都一流，難怪一班員工個個都咁賣力工作。講番心水，第五場「佳同」近兩仗試前試後都有唔錯走勢，今次開齋可期。另外推介第三場「中環英雄」，縮返嚟跑1400米會有唔同演出。

張敬山

排內檔起步好好彩

　　杜利萊今日手馬好惡，贏兩、三場絕對唔奇，先推介第九場「好好彩」，響谷草熱身一場之後，近兩仗跑泥地1200米非冠即亞，輸嗰場亦只係輸條頸，擺明泥地出色，今次已冇「富貴金龍」呢類惡馬同場，排埋二檔篤定補中。另外鍾意第三場「八逢九紫」，上場能夠揮低「傾力之城」贏馬，水準唔簡單，今次對手唔見得強，爭取連捷應冇難度。

寇鴻萍、梁廷鏘

蜚聲泥地一樣掂

　　剛啱姚本輝憑「創先機」同「經典能量」起孖，後駒仲爆出85倍大冷W，可見練者冷熱都搏。今日姚本輝雖然出馬唔多，但我都繼續捧佢場，先推介第五場「進取」，上次直路一陣風咁追過「風雲武士」，後駒再出已補中，賽事水準如何唔使多講，再跑四班賽穩執多一場。另外推介第六場「蜚聲」，上次重戴眼罩跑得唔錯，今次轉跑泥地繼續戴呢件配備，贏得。

任達華