朝早有動靜：天外之天縮程惡

猪拉多纳

　　昨朝晨課， 告東尼、伍碧權、霍利時、苗禮德及姚本輝等練馬師均甚為緊張，連馬匹加課出踱的簡單工序亦吼到實，似乎心中有馬，值得盯緊此幾路人馬。

伍碧權積極督操

　　其中伍碧權不單昨朝動態緊張，近日晨課亦經常走來走去督操，今戰應該有所行動，其中「天外之天」、「飛魚駿王」兩駒近期甚弗，看來是郁手時候矣。

　　列陣第五場第四班1400米的「天外之天」，以往由何澤堯騎過兩次，取得一場頭馬，人馬合拍。上仗出爭1800米對此駒來說是略長多少，今番小休後縮回1400米上陣必更合發揮。日前，此駒在草地拍「神采飛揚」試一課，沿途走來虎虎生威，狀態來得理想，今戰應可重開勝門。

　　事實上，何澤堯自12月1日憑「太極至尊」及「威力高」起孖之後，至今已逾一個月未有頭馬見面，近期坐騎數目也減少，受歡迎程度似乎有所下降。既然處於劣勢，相信騎者也會珍惜每次上陣機會，今日來自外線的「天外之天」實力出眾，有力為他打破悶局。

韋柏