朝早有動靜：胡森大舉出擊

港陌

　　蔡約翰除練馬功力出神入化之外，工作態度勤奮更是同行中數一數二，一個星期經常操足七天，大時大節亦如常開工，真係風雨不改。昨晨天寒地凍，仍見蔡約翰在試閘前與韋達有傾有講，鏡頭較少見，相信應為馬事而來，不排除為今晚戰駒定下出擊策略。

　　翻查紀錄，以往蔡約翰一向對谷戰興趣不大，上季整季只在谷草取得七場頭馬，但今季似乎轉了手法，至現時為止已在谷草取得六場頭馬進帳，證明馬房部署有變，不再局限田草作為主要爭分之地。一眾蔡廐馬中，要留意第六場「幸運精彩」，近兩仗在田草1400米取勝，但其實大前仗已在谷草有接近演出，今番轉場而戰，有力取得三連捷。

大王者咪睇小

　　另外，胡森元旦日憑「友運行」贏馬，近兩朝練者心情亦甚靚，督操時更經常笑笑口，不排除今晚又有料到。晨課所見，胡森對「尚駿心」、「紅褲子」及「大王者」三駒非常關注，常護送出入。其中「大王者」上仗已有接近走勢，今次再跑谷草一哩，有力重開勝門。

韋柏