馬主論戰

魑魅魍魉

瀟洒靚龍謀交代

　　今日係我孖生細佬B o b b y 嘅生日，響度先祝佢生日快樂！噚晚有成二十幾位朋友由北京落咗嚟，同我哋一齊食飯慶祝，仲有唔少馬圈中人到賀，一班人玩得相當開心。講番今日心水，鍾意頭場「瀟洒靚龍」，今季跑三場全部入前四名，演出算穩定，用到韋達係時候交代。另外推介「黃金褭蹄」，上場輕描淡寫都追入第四，換個手風大順嘅巫斯義上去，贏得。

張敬山

駕世仔轉場見真章

　　經過季初一輪急攻之後，方廐攻勢一度放緩，到近兩次夜賽終有「智友」、「小鬥士」勝出，估計第二浪攻勢即將展開。推介第六場「駕世仔」，前仗初出跑田草1200米得第四，走勢相當搶眼，難怪上場轉跑谷草都有好重飛，可惜出閘冇耐就墮馬。不過，復課後此駒工夫一切正常，證明健康完全冇問題，今次轉番去沙田作賽，應該可重現威力。

寇鴻萍、梁廷鏘

快利多有權補中

　　告東尼今日手馬好惡，要贏兩、三場唔係難事。先推介第五場「快利多」，季初跑過三場冇嘢睇，上場易配高雅志卻有唔同演出，只係以頭位輸畀「信賴」跑第二，證明戰鬥力並唔曳，今次用番蔡明紹騎，同場對手唔算強，有權贏馬補中。

　　另一匹要留意嘅東廐馬係「綠續有贏」，上場轉跑泥地都上名，近況弗得交關，轉跑1400米一樣可以應付，咪睇小。

任達華