高清睇跑馬：雄獅寶貝收復失地

猪拉多纳

　　第五場四班1400米，「雄獅寶貝」起初由姚廐訓練，上季由安廐接手，依然未能打開勝門，幕後心有不甘上季尾再轉去沈廐，首戰牛刀小試已跑近，今季首戰總場次40田草五班1400米立即殺入季軍，輸畀之後再贏的「嘉寶神駒」四分三身位；接戰總場次121田草五班1400米，更順利補中。

　　最誇張上仗升班跑總場次225四班田草1400米，對手惡得多，依然有好表現，最可惜衝刺之際慘坐包廂，若非如此，肯定改寫戰果，至於是否應該抗議得值，觀點人人不同，但有一點更吸引，就係賽前備戰平平間期僅跳兩課，加上曾缺課六日，難得依然有好表現。今次賽前工夫積極，繼續由紀仁安操刀角逐同程，補中在望。

金鑾大殿四班過客

　　第六場四班1600米，「金鑾大殿」二月正選參戰，可惜右後腳受傷退出，不久更進行閹割手術，故此等到十一月才首次出戰，然而初出一樣有好表現，前速偏慢全程殿後，入到直路落後極多，最後卻交出凌厲衝刺追入第六，只負頭馬兩馬位。

　　上仗備受追捧唔意外，但僅僅跑過一次1200米，突然大幅增程1600米，仲要落重飛開跑，幕後信心極大，雖僅跑第三，但由1200米跳上 1600米，且三歲馬要負重磅，加上在偏慢步速下交出最快末段時間，此席季軍絕對有交代，四班必屬過客，有過一場1600米經驗，明日應可順利開齋。

Sam