高清睇跑馬：電光能源泥地稱王

猪拉多纳

　　第九場一班泥地1200米，「電光能源」泥地之王當之無愧，除了首次跑泥地得第五，之後四戰未逢敵手，不計前季負頂磅殺退「熊中雄」，每一戰都大勝，最威水上季總場次440一班1200米，該役負重磅，柏寶擔心被困，大半程走三叠，入到直路再走出最外檔，蝕位極多照贏，仲要大勝三個幾身位，再看看跑出時間嚇了一跳，跑出1.08.1，比起「奇異福星」保持的紀錄僅慢三線。

負頂磅大勝

　　再講「奇異福星」負輕磅跑出快時間，但「電光能源」卻負頂磅，難度之高可想而知，不要忘記該戰穩操勝券，柏寶一早收韁，未有積極推騎，否則跑出更快時間。此駒今季三戰草地雖敗不遠，今戰首本戲不勝無歸。

　　另外，第三場四班草地1600米，「天外之天」上季新馬首戰落敗，第二戰加開縫眼罩殺入冷位，接住兩戰一亞一殿，質素不俗。今季首戰一擊即中，且贏得輕鬆，末段潘頓收韁贏馬，亞軍「吉利多」之後多取兩次亞軍水準亦高。

　　上仗由龍變蟲，歸根究底十四檔起步，早段諗住切入二叠，卻被一路催策的「強駒」頂出走三叠冇遮擋，到了九百米「聚有盈」向外斜跑，把「天外之天」帶出第四叠，蝕位極多。

　　賽後又驗出氣管有痰，此場敗績可以抹去，今戰捲土重來戰意可靠，由何澤堯減磅上陣，不跑勝途1400米，改攻1600米胸有成竹。

Sam