馬主論戰

魑魅魍魉

一言為定換人搏殺

　　方嘉柏剛啱憑「威威財星」贏馬兼捧盃，唔經唔覺今季已贏咗20場頭馬。雖然今日方廐出馬唔多，但第六場「一言為定」就值得吼實，季初配都爾跑 1600米贏條街返嚟，三班唔會留得住，上次用何澤堯跑梗頸四，今次即刻搵番都爾騎，搏殺決心明顯。另外推介第九場「飛銀動力」，熱身後應該跑得更好，可以補中。

萬子千紅１定掂

　　告東尼今日手馬好惡，我睇好佢有馬贏，不妨吼實呢路人馬。先推介第五場「萬子千紅」，最近響田草1800米打叠贏咗兩場，四歲馬開咗竅，繼續跑贏馬路程，仲要排埋1檔起步，三連捷話咁易。另外鍾意第八場「萬事佳」，上場響沙田短途錦標輸畀「蓮華生輝」無話可說，今次跑一班賽對手冇咁強，應該輪到佢發威。

幸運勁唞夠威力強

　　剛啱全泥夜賽，蔡約翰冇馬贏，始終田草賽事先至係佢杯茶。今日蔡廐陣容幾強，要贏馬應該冇難度，先吼第九場「幸運勁」，雖然唞咗成年冇跑，但上季首戰亦入Q，證明久休復出威力強，今次吼準樂聲盃上陣，唔似陪跑。另外鍾意第八場「勁飛寶」，初出馬配馬房近期愛將楊明綸，賽前做足晒工夫，話唔定可一鳴驚人。