洪禮賢講馬：威威多星班分有利

港陌

　　第九場三班1200米。「威威多星」初出之前唔覺早課有咩特別（或是自己睇唔起），試跑唔算好火氣，大閘走勢唔順兼唔起眼，有可能性格係咁，朝早識扮嘢。但落場跑喺前中段一樣唔覺熟練，出閘唔多快，途中難穩定，入到直路初期又唔肯移出望空，基本上要錯都幾乎齊晒。但佢臨尾愈衝愈勁冇花假，如果直路頭唔係自己內閃，能夠早啲撻着後勁，贏唔贏到唔敢講，Ｑ腳應該會攞到，照咁睇，評分在7字頭起步，上升空間多的是。如果呢場隻馬係咁意喺陣上錯少一瓣，三甲一席走唔甩。

　　第十場三班1600米。「一言為定」上場贏咁遠有咩意義？望吓佢今年貴庾就知，4歲仔大勝求加分多，可能放眼4歲系列賽。總之，上賽加咗15分，轉用小何，實際只多負5磅，計死數在三班仍然賺（上賽締速今季第二快），再Ｗ機會大。