喀麥隆省招牌新丁有難

猪拉多纳

今晚非國盃A組展開次輪賽事，尾場由「非洲雄獅」喀麥隆出戰畿內亞比紹。喀麥隆首仗大意失分，今仗實在唔衰得，雖然「新丁」畿內亞比紹戰意頑強，但近2次交手「非洲雄獅」全部贏晒，今仗可恃質搶3分，讓半一照捧上盤。

（TVB 302周四凌晨3時直播）

喀麥隆近年喺非國盃冇料到，上屆於分組賽出局，再前兩屆衰到連決賽周都入唔到；雖然利物浦中堅祖爾麥迪比自稱有傷未獲徵召，好彩後防仲有里昂守將尼高拉斯尼古路撐住，前鋒莫簡祖喺首仗對布基納法索先入波以為W硬，點知最後被對手逼和1比1，未能打響頭炮。自從「獵豹」伊度奧退出國家隊後，喀麥隆無疑攻力有所削弱，不過爛船都仲有三斤釘，其中效力比錫達斯嘅箭頭阿布巴卡質素唔曳。
畿內亞比紹兩次對賽輸晒

睇番小組形勢，依家A組4隊同得1分，大家出線機會均等，因此喀麥隆若果今仗取勝就可搶到先機。首度進身非國盃決賽周嘅畿內亞比紹，首仗完場前逼和東道主加蓬純粹夠運，況且近兩次交手喀麥隆皆贏波，包括上年6月嘅非國盃外圍賽，「非洲雄獅」就係靠莫簡祖一箭定江山贏波，今仗隨時又重溫好夢，畿軍大賽經驗不足難逞強，一於捧「非洲雄獅」上盤。