恒大爭出線還看紅鑽

猪拉多纳

尋晚亞冠H組分組賽，上屆盟主FC廣州（廣州恒大淘寶）於非勝不可下，憑住郜林入波兼助攻，作客以2比0擊敗浦項制鐵。不過呢支中超班霸亦唔好開心得咁早，因為同組嘅浦和紅鑽只要今晚作客打和「一哥」FC悉尼，兩隊就會踢走FC廣州攜手出線。

（now 670周三晚6時直播）

FC廣州頭4仗未贏過僅得2分排包尾，落後「一哥」FC悉尼及次席浦和紅鑽7分及5分，為求絕境重生爭出線，尋晚作客浦項制鐵，雖有鄭智、積臣馬天尼斯、張琳芃等主力缺陣，但喺許勝不許和下，一開波即搶攻，先有馮瀟霆妙傳荷西保連奴近門射斜，去到32分鐘，郜林於左路斬入禁區，遠柱嘅列卡度高拉特入楔窄位打破僵局。領先1粒嘅FC廣州未有放鬆，易邊後僅2分鐘，小將徐新大腳長傳，郜林殺入禁區起左腳射成2比0，呢位中國國腳入波助攻瓣瓣有，成為FC廣州今仗贏波英雄。
紅鑽和都掂「細」守悉尼

雖然FC廣州今屆亞冠終於開齋，但想出線仍要睇次席紅鑽嘅面色；今晚紅鑽造訪「一哥」FC悉尼，只要今仗打和，佢哋仍lead住3分，就算最後1輪紅鑽輸波，而FC廣州贏波追至同分，但紅鑽亦可肯定憑較佳對賽成績壓過FC廣州呢支上屆盟主出線。紅鑽連盃賽近7仗錄得5勝2和未輸過，只係失咗4球，防守頂得兩嘴，最重要係隨住FC廣州今仗擊敗制鐵，反而令FC悉尼提早晉級，今仗未必咁上心爭勝，雙方隨時踢得穩打穩紮，夾計打和踢走FC廣州，預計今仗唔慌多波入，細盤值博。