利物浦讓得辣顯信心

猪拉多纳

英超進入白熱化階段，一頭一尾基本上成定局，部分外圍莊家甚至提早派彩畀買李斯特城奪冠嘅投X者。其實「狐狸」異軍突起，製造唔少冷門賽果，為菠菜公司帶來巨額利潤，所以唔介意提早派彩益街坊，仲可以贏埋聲譽，絕對係名利雙收。今晚英超利物浦主場對史篤城，紅軍備受莊家睇好，讓半一，仲要大低水，睇嚟有料到，跟買上盤。

（now622周日晚11時直播）
史篤城傷畢蘭特打擊大

利物浦改由高普執教，漸入佳境，但始終中途臨危受命，現時人腳並非佢心目中理想選擇，難得咁都有不俗發揮，其實已經有晒交代。特別係近期鬥曼城同熱刺，分別取得1勝1和，證明實力可以媲美爭標分子。利物浦對排名相若嘅史篤城，要讓半一咁狠，凸顯莊家認定佢哋級數遠勝對手。

史篤城本身人腳質素次一級，難得出產國腳級門將畢蘭特，可惜佢早前為英格蘭踢熱身賽受傷，提早收咧，對球隊打擊非常大，上仗英超主場領先兩球，都被史雲斯逼和2比2，更令人懷念畢蘭特，睇怕今場作客頂唔住利物浦嘅來襲。

意甲拿玻里上仗意外輸波，為免被祖雲達斯放甩，今仗主場對包尾嘅維羅納，都冇得留手，應可大勝一仗重振士氣。仲要注意嘅係，拖連奴近5場主場未贏過，今仗主場讓唔起兩連勝嘅阿特蘭大半一，要下盤。