國足誓宰卡塔爾

猪拉多纳

今日係世界盃外圍賽亞洲區第2圈煞科日，最矚目非C組中國主場火併卡塔爾莫屬。國足力爭殺入第3圈嘅12強賽，今仗非勝不可，亦係主帥高洪波彌補5年前輸畀卡軍嘅最後救贖，主力張琳芃趕及傷愈復出，令士氣大振，況且卡塔爾已篤定出線，賽前一日先抵達中國備戰，唔多上心喎，加上3名主力坐波監，隨時賣個順水人情hea踢唔奇，生死關頭下國足必定搏甩髀，主隊讓半一上盤必捧。(樂視810台周二晚8時15分直播)

未開波國足先贏氣勢，今仗舉行場地陝西省體育場嘅全場波飛火速售罄，工作人員趕製5000個黃色加油板，讓球迷砌成「中國加油」嘅大型打氣圖案，利好消息接踵而至，上仗對馬爾代夫缺陣嘅後防主力張琳芃，據報已經好番，並有隨大軍操練，相信今仗可趕及復出，令軍心大振。

值得一提係，臨危受命嘅國足主帥高洪波，2009年首度接手國足時原本勢頭唔錯，點知2011年於亞洲盃決賽周分組賽次仗大玩輪換，搞到0比2不敵卡塔爾，導致出局，亦成為高帥之後被炒嘅導火線，今仗再遇卡塔爾，高帥必全力一擊彌補5年前玩嘢之過。最重要係，國足現時要爭取成為8組中4支最佳第2名之一嘅出線12強賽，大前提係今仗必須贏波，和波都唔掂，目標鮮明，鬥心唔使懷疑。
卡塔爾3主力坐波監

另一邊廂，卡塔爾主力前鋒凱度斯、蘇尼亞、中場艾沙達拉，因上仗鬥港隊攞黃牌，累計下今仗齊齊坐波監，連守將耶沙亞都打柴，實力大削。而且卡塔爾早已篤定出線，無論今仗贏輸都唔會受影響，佢哋於尋日先飛抵中國備戰，睇嚟班波戰意一般，hea踢唔奇，頂唔住背城借一嘅國足，國足前鋒姜寧上仗大勝馬爾代夫4比0之役「戴帽」，腳風甚順，主場讓半一照捧上盤。