尹帥效應撐曼聯「讓客」

猪拉多纳

今晚歐霸盃16強首回合爆發「雙紅會」，由利物浦主場惡鬥曼聯，亦係英超「雙紅」史上首次於歐洲賽交手，隨時比前幾日歐聯更精彩。利物浦雖有回勇迹象，但佢哋一向踢慣海鮮波信唔過，而且曼聯成班小將初生之犢不畏虎，加上自領隊尹戈爾上任後，5鬥紅軍全數勝出，格食格下絕對唔赦佢哋，今場仲有得受讓咁筍，斯維力撐紅魔讓球客勝。

(now 670周五凌晨4時05分直播)

利物浦於英聯盃決賽互射12碼輸畀曼城後，先於聯賽擊敗「藍月亮」復仇成功，上仗更反勝水晶宮，極速反彈睇落唔曳。但正所謂「若要生活好，咪買利物浦」，紅軍一向慣踢海鮮波，表現飄忽到暈，當然今仗對死敵曼聯，應會加多兩錢肉緊，但肉緊唔代表一定贏，紅軍今季通常兩連勝後斷纜，只曾試過1次3連勝及1次4連勝，仲要係上年10月尾至12月頭嘅事，即係話佢哋今年未試過連贏3場。
「入魔」5戰紅軍全勝

曼聯主帥尹戈爾不嬲命硬，儘管剛喺聯賽不敵西布朗，但同桑馬達早段被逐大有關係，查實佢哋近期踢得勁Sharp醒，喺輸畀西布朗前試過4連勝，包括歐霸盃大數米迪蘭特及英超擊敗阿仙奴。其中尹帥在傷兵滿營下焗用新仔，反而因禍得福，打起「福仔」拉舒福特、古利姆華利拿等從2隊提拔上來嘅小將，仲有今季經常上陣嘅師兄連格及保夫域積遜，佢哋肯搏肯拚又冇怯場，逐漸獲得尹帥信任。除咗呢班「小紅魔」之外，季初令人失望嘅「水貨」迪比，近期亦重拾信心，加上「新亨利」安東尼馬迪爾已傷愈復出，勢必增強紅魔前線火力。

最重要尹戈爾係名副其實嘅「紅軍剋星」，呢位老帥自上季登陸英超後，帶隊5次出戰利物浦竟錄得全勝佳績，單係今季聯賽就雙殺紅軍，真係唔到你唔服，今仗可謂坐和望贏，讓球主客和仲有得受讓，紅魔嘅讓球客勝乃不二之選。