史浩克兵源足上盤打堡

猪拉多纳

德甲快車史浩克04主場迎戰漢堡，兩軍近期表現同成績都唔理想，但相比之下史浩克係歐洲賽常客，踢慣一周雙賽，加上兵源充裕年輕小將多，絕對着數過護慣級好少踢得密嘅漢堡。黑柴相信史浩克今晚主場可以踢翻身仗，讓半一撐2.05倍上盤。

（now 671周四凌晨3時直播）

史浩克近5場正式賽事未贏過，上周中歐霸盃主場慘吞薩克達3蛋出局，賽後畀球迷鬧爆，教練比騰列達喺剛周日聯賽作客法蘭克福選擇玩保守，除排出4後衞外，仲安排另外兩名二閘祖利亞卡卡拉同哥拉辛拿斯踢中場，3大攻擊手麥斯美亞，利萊辛尼同迪山度喺尾段至入替，另外兩位主力攻擊球員貝漢達同亨特拉爾亦踢唔足，擺明留番今仗搏殺，希望氹番班fans。史浩克始終兵源較足，快車賽程有利回氣，首循環作客都贏漢堡，今晚有望再下一城。
漢堡不擅輪換捱到殘

漢堡今季成績及鬥志比近季稍好，唔使長期喺榜尾掙扎，不過近9場聯賽只曾1勝。漢堡教練拉巴迪亞不擅輪換，球隊近兩輪聯賽都沿用完全相同陣容，快車賽程好蝕底。加上漢堡球員踢得辣易犯規，對住有罰球專家祖漢斯基斯嘅史浩克好牙煙。今場漢堡仲有中場大將肯特受背傷困擾上陣成疑，作客睇淡。