飛腳紅鑽省招牌

猪拉多纳

成績唔掂面臨減席位

中超球隊強勢崛起，令曾經都係以「星戰策略」盛極一時嘅日職球隊黯然失色，甚至面臨被削減亞冠盃分組賽席位。今屆亞冠盃展開前，日本足總舉行大會，鼓勵4支參賽球隊振作。大阪飛腳、浦和紅鑽今日分途出擊，唔只為球隊利益而戰，更關乎挽救日職招牌嘅任務。

根據亞洲聯賽排名，韓職以89,838分排東亞區第一，日職（74,959分）排第二，澳職（67,680分）排第三，中超（65,364分）排第四。日職球隊近年亞冠成績一般，反觀FC廣州近3屆2次捧盃，令中超得分急升，若然走勢持續，中超下屆排名可能超越日職。如果成真，意味有3支中超球隊可直入分組賽，1隊踢第3圈外圍賽。若然日職排名跌出前二，屆時只有2支日職球隊直入分組賽，另外2支分別要踢第2及第3圈外圍賽，出局風險增加。因此，今屆4支日本球隊必須額外落力爭取佳績。
藍翼未操起難讓飛腳

G組大阪飛腳作客南韓水原藍翼，上屆4強分子飛腳剛於日超盃1比3輸畀廣島三箭，但話晒已踢過正式賽事，而且日職將於周六開鑼，飛腳狀態應該恢復得七七八八。韓職要等到3月12日先至開咧，水原藍翼備戰工作成疑，讓唔起對手，要大阪飛腳讓球客勝。

（now 671周三晚6時30分直播）

H組浦和紅鑽主場對FC悉尼，雖然紅鑽上屆分組賽包尾出局，但3位前鋒武藤雄樹、興梠慎三、隆比真歷都有質素，武、興二人上季日職兩階段合共射入25球。FC悉尼陷入低潮，近5仗只有2和3負。浦和紅鑽主W1.53倍熱得有道理。

（now 672周三晚6時30分直播）