廣島飛腳入球騷娛賓

猪拉多纳

盃賽交手大盤率逾8成

話咁快日職下個禮拜又開打嘞，今日先嚟一場日本超級盃熱吓身先，由廣島三箭、大阪飛腳呢對冤家拗手瓜，基於兩隊對賽好少出現悶場，盃賽交手開大比率更達82個巴仙，冇理由唔博1.85倍入球大啫。（有線61、201周六中午12:35直播）

如果單睇近6屆日超盃嘅賽果，真係畀槍指住都未必敢買大，因為1大5細條開細攤路明顯不過，但係玩足球菠菜如果一本通書睇到老，唔去因應對賽雙方特性、球員狀態等等調整，真係可以輸到老都似。

廣島、飛腳都係日職比較敢進攻嘅球隊，尤其後者更加係打死罷就嗰隻，呢種現象喺盃賽仲明顯，睇番咁多年嚟兩隊响日聯盃、日皇盃交手11次，搞咗個9大2細出嚟，開細比率得18個巴仙，足智彩個入球大細兩邊均水，就知道操盤手並唔相信日超盃啲往績。
廣島換代工程屆成熟期

講真吖，廣島上季件主力射手戴恩費斯杜格拉斯去咗中東搵食，驟眼睇非常不利佢哋，特別係呢支上季日職冠軍，只係由清水心跳借咗件尼日利亞兵彼得烏達卡，又撬埋京都不死鳥件宮吉拓實，就算係補充咗鋒力，畀唔到人太大信心。不過，廣島呢兩年進行緊換代工程，淺野拓磨、柴崎晃誠、野津田岳人一批o靚仔開始步成入成熟期，連日媒畀佢哋嘅爭霸實力評分都係A級，冇理由睇得廣島太死啫。
飛腳強勢 戰力達A+級

飛腳就氣勢好好多，除咗件重炮安達臣柏德列、宇佐美貴史呢啲主力留隊，又借埋上季踢橫濱水手嘅前巴西U21射手艾迪臣巴拉加，被日媒形容為攻擊力出類拔萃，綜合戰力達到A+級別，唔怪得足智彩要佢哋讓廣島平半。但係大家要注意一點，自從長谷川健太2013年上任做監督以後，飛腳連續3季季初5場波都係表現麻麻，13年係1勝4和，14年1勝2和2負，15年加埋日超盃同亞冠盃仲慘，得1勝1和3負，慢熱到得人驚，所以今場飛腳讓波掂唔過，博吓佢兩隊入球騷娛賓仲實際。