雷恩 聖伊天死火冇攻「細」

猪拉多纳

法甲今晚有場獨腳戲，由雷恩主場迎戰聖伊天，兩隊歇冬後仲未回魂，火力仲愈嚟愈弱。既然兩邊個態都咁頹，都唔似會多波入，1.54倍入球細值博。

（TVB302周五凌晨4:00直播）

雷恩喺聯賽重開後，連盃賽在內取得2勝2和2負，表現唔算太曳，但要留意班波近兩場比賽，只係靠對方擺烏龍先入到1粒，不禁令人對佢哋嘅火力產生疑問。雖然話今晚有主場之利，但近10次主場賽事僅錄得1勝，好難寄望佢哋突然打幾高班波。況且主力中場杜哥利喺轉會窗關閉前一刻離隊，加埋中場柏度漢歷基干遜、哥古夫倦勤，隨時想組織似樣啲嘅攻勢都冇。
近4次交手3度交白卷

想旨意聖伊天入波就更加難，班波歇冬後6戰僅取得1勝，計落近8次法甲只入得5粒，仲點信得過先？雖然班波積極增兵，包括打包洛辛堡前鋒蘇達倫、中場施拿爾斯，荷華高斯翼鋒坦拿尼同史雲斯守將達賓奴，但齋睇級數唔似幫得到太多喎。

更大問題係，首席前鋒伊沙域亦陷入球荒，接近2個月冇貨交，真係唔知可以搵邊個幫手士哥。翻查兩軍對上4次交手全開細盤之餘，仲有3場互交白卷添，不妨再追。