雷恩聖伊天鬥弱雞半和最好路

猪拉多纳

今個周中法甲快車最後一站，由雷恩主場迎戰聖伊天，兩軍近況都一般，雷恩近10仗主場僅錄1勝，聖伊天近9場作客更加未贏過，加上大家陣中都有唔少傷兵，預計今仗對壘會穩陣行先，聖伊天近8仗6次開出半場和，不妨再追。

（TVB 302周五凌晨4時直播）

雷恩日前於聯賽慘吞波爾多4蛋，中場柏度漢歷基干遜、哥古夫及後衞魯杜域巴爾仲未好番之餘，中堅科路戴亞尼今仗仲要坐波監，而且近10仗主場贏得一場咁大把，真係冇乜本錢讓波。

至於對手聖伊天亦唔好得幾多，尤其係作客成績曳到冇朋友，近9仗竟未嘗一勝，前鋒羅拔比歷、中場夏蒙馬、後衞伊高圖及盧斯佩連續因傷倦勤，佢哋最大問題係攻力非常疲弱，之前8仗聯賽只入5球，作客場合當然又係要先做好防守，聖軍連盃賽近8仗6度開出半場和，證明呢班波初段靠守頂得兩嘴，況且兩軍近4次交手有3次開出半場和，既然咁旺，值得捧場。