曼城再鬥愛華頓大報復

猪拉多纳

「雙藍大戰」曼城主場鬥愛華頓，「藍月亮」今季主場火力強勁，連續13次主場出擊全開大，對手愛華頓亦有弗爆前鋒盧卡古助陣，今場誓必上演一場駁火戰，入球大點可以錯過！

（now 622周四凌晨3時45分直播）
盧卡古腳風順曾破「城」

曼城主場威力勁過作客多多聲，主場出擊往往會火力全開，齋睇對上6次主場比賽，一共轟入18球，不但箭頭阿古路、韋菲特邦尼有進帳，就連中場史達寧、耶耶托尼、奇雲迪布尼同守將高拉洛夫等人均有建功，全方位發炮令對手防不勝防。加上曼城喺上周四英聯盃作客不敵愛華頓1比2，今仗回師主場誓要復仇。

不過，「藍月亮」喺中堅高柏尼缺陣下，防線未見穩健，連續6場主場均有失球，就算迎戰英冠球隊侯城都未能保持清白之身，另一中堅文加拉亦因傷避戰，曼城今仗惡鬥火力暫時排英超第3嘅愛華頓，相信好難「零封」對手。更何況「拖肥糖」射手盧卡古狀態大勇，暫以15個聯賽入球，同占美華迪並列射手榜第1位，呢位比利時射手上場鬥「藍月亮」亦有斬獲，證明「拖肥糖」有力一拚，相信今仗大手交易機會甚高，一於博入球大喇！