雙「城」記Goal手「大」駁火

猪拉多纳

叉足電踢爭標關鍵戰

今晚英超獨腳戲上演「雙城記」，由李斯特城主場惡鬥曼城。兩隊賽前同以37個入球冠絕聯賽，「李城」有華迪同近排弗爆嘅馬列斯搶胡，「藍月亮」就有阿古路重新掛帥，射手大駁火，與其估輸贏，不如直取1.57倍入球大。

（now621台周三凌晨3:45直播）

「聖誕快車」賽程對板櫈深度夠嘅曼城嚟講，相對較容易應付，好似球隊上輪比賽主場鬥新特蘭，即使收起王牌阿古路，都能夠大勝對手4:1。家陣「藍月亮」喺聯賽榜排第3，預料呢位阿根廷射手今場會重新掛帥，主動搶攻務求全取3分，向英超錦標邁進。

冇錯，「藍月亮」對上4次都砌低「狐狸」，不過班波呢排作客表現勁唔穩定，連續5仗英超客戰唔識贏。更大鑊係佢哋防線甩漏多，偏偏中路大將高柏尼上仗又再受傷，呢位比利時鐵衞由2013年1月起計，已經8次受傷，加加埋埋缺陣近10個月。主帥比歷連尼更透露，高柏尼今次傷勢手尾長，唔知佢幾時可以復出，仲話擔心會影響佢之後嘅職業生涯添。
「李城」主場例有士哥

睇曼城之前冇咗高柏尼幫手，場場都畀人攻破大門，就知班後防表現堅信唔過，呢次造訪今季英超主場例有波入嘅李斯特城，仲點寄望佢哋守得住清白身先？

「李城」呢輪比賽前排榜首，雖然佢哋喺「拆禮物日」以0:1敗走利物浦，11場不敗走勢終結，不過一對箭頭占美華迪、馬列斯上仗被調離場提早休息，相信今晚會繼續開火搶分。事實上，「狐狸」今季對住愛華頓、阿仙奴等火力強嘅勁旅，都唔會死守踢悶波，既然兩軍同樣火力旺盛，一場入球騷應該走唔甩。