李城主場受讓筍

猪拉多纳

曼城冇高柏尼後防穿窿

今晚英超獨腳戲爆發前列大戰，由榜首李斯特城主場硬撼三哥曼城。李斯特城上仗輸波，主帥雲尼亞里立即高呼傳媒唔好再鼓吹「狐狸」爭冠，適時為球隊減壓果然係「老狐狸」；曼城隊長高柏尼一傷再傷手尾長，無論用迪米捷利斯、文加拉或奧達文迪扼守中路，後防都震過貓王，加上近5仗聯賽作客未贏過，梗係捧番受讓嘅李斯特城讓球主勝喇。

（now 621周三凌晨3時45分直播）

李斯特城上仗不敵利物浦，被打破近10場聯賽不敗佳績，但撞正阿仙奴慘敗而續居榜首，認真有運。不過行走江湖多年嘅主帥雲尼亞里，趁機發表「偉論」，話眾將攰又話人氣射手占美華迪有傷，叫傳媒唔好再狂吹「狐狸」可以捧走英超冠軍。斯維睇波多年，都知道雲帥抗壓能力較弱，佢執教冇人期望嘅中型班屢有驚喜，例如費倫天拿、拿玻里、初期嘅華倫西亞及車路士，一旦期望愈大心雄想爭標嗰陣，佢老人家就方寸大亂，未能令麾下球員用平常心面對爭標壓力就崩潰，好似後期嘅車仔及04年回巢剛膺雙料冠軍嘅華倫西亞。適逢啱啱輸波，雲尼亞里梗係乘機狂吹「淡風」為球隊「降溫」喇。
少咗定海神針場場失

斯維亦明白李斯特城呢類中型班成績咁好係打道氣，論人腳畀曼城甩開十條街喇，不過「藍月亮」隊長高柏尼今季長期因傷缺陣，上仗復出後備落場又傷出，今仗肯定冇佢份。查實主帥比歷連尼今季先後用過迪米捷利斯、文加拉或奧達文迪扼守中路，冇一個畀到人信心，冇咗高柏尼呢支定海神針坐鎮，令比帥整體壓前嘅戰術暴露更多漏洞。

睇番曼城今季聯賽作客成績，頭3仗全勝兼冇失波，咁蹺都有高柏尼壓陣，近5仗只錄得2和3負失8球，而呢5仗高柏尼只曾1次披甲（0比0和維拉），即係話「藍月亮」冇咗呢位隊長，作客唔識贏波之餘，仲場場有失波，完全唔似一支爭標分子。今仗撞正擅打反擊嘅李斯特城，曼城後防真係有得震冇得瞓，仲要讓波，咪玩喇，一於撐受讓兼有地利嘅「狐狸」。