阿仙奴未回魂反得過

猪拉多纳

剛吞修咸頓4蛋匆匆再戰

拆禮物日變成拆「廠」日，前晚英超尾場爆大冷，阿仙奴作客0比4慘敗於修咸頓腳下，爆出100倍波膽！兵工廠唔止錯失升上榜首機會，更遭受近105年來Boxing Day最大敗仗，士氣大受打擊，領隊雲格準備1月買兵救亡。不過阿仙奴今晚英超匆匆再戰，主場對「巨人殺手」 般尼茅夫絕對唔易啃，仲要讓一球/球半未免太過火，寧博有1.83倍嘅般尼茅夫下盤。

（now 622周二凌晨1時30分直播）

上周六晚先開波嘅榜首球隊李斯特城輸波，全世界以為壓軸登場嘅阿仙奴可趁機做一哥，點知竟然慘吞已6仗不勝嘅修咸頓4蛋。賽後雲格死撐指球證誤判令球隊失利，但其實輸波主因係中場傷兵太多，因此雲格計劃1月收購防守中場，加強攔截力，好大機會下周以700萬鎊簽下瑞士勁旅巴素利嘅23歲新星艾連尼，西維爾中場基祖華克亦有望來投，另外慕遜加柏中場格列沙加亦係兵工廠收購目標。不過阿仙奴仲要捱埋今場聯賽先有望獲新血助陣，由於兩場比賽只相隔48小時，球員未必回得切氣，對於要搶分爭標嘅兵工廠影響甚大，贏波難度高，今仗讓一球/球半，換言之要贏夠兩球先至可以贏盤，實在制唔過。
般尼茅夫下盤抵玩

今季新升班嘅般尼茅夫愈戰愈勇，近6仗不敗，包括擊敗車路士同曼聯，上仗對第5位嘅水晶宮亦唔使輸，硬淨到不得了。呢類細球會打順道氣唔易砌，現時般尼茅夫士氣高昂，千祈咪睇小，更何況佢哋輸1粒都仲有半個盤執，的確抵玩。