史浩克 賀芬咸劑劑打「大」交

猪拉多纳

家陣天氣凍咗咁多，夜晚起身睇波撞正場比賽冇交收嘅話，都咪話唔攞命。好在今晚德甲非常貼心，安排咗史浩克04主場對賀芬咸嘅戲碼。呢兩隊波對上7次交手都冇悶場，次次合力炮製至少3個入球，咁好路點可以唔追，就算入球中位數升至2.5/3球，1.8倍入球大仍然係信心之選。

（now670台、有線61及201周六凌晨3:30直播）
爭入前4 Vs 搶分護級

史浩克今季表現反覆，皆因要分心歐霸盃，搞到班波往往喺歐戰前後失分。但隨住佢哋出線32強後，相信嚟緊可以專注德甲，今仗梗係要全力開火搶分殺返前4。事實上，佢哋過去喺周五主場出擊成績唔失禮，對上12鋪都未輸過，今仗對住今季9場作客僅1勝嘅賀芬咸，誓要入多2粒搶分兼追番得失球差。

對手賀芬咸上仗主場1:0砌低漢諾威，中止8場不勝走勢，總算擺脫榜尾位置，之但係佢哋仍深受降班威脅。若然班球員唔想愁住過聖誕，呢鋪就要全力全勝，一旦贏波球隊至少升至第14位，將壓力包袱拋畀其他隊。既然雙方對上7次碰頭都打晒大交，呢鋪大家同樣心急搶分仲點會縮，一於再追大盤。