狼隊死火咬唔入列斯聯

猪拉多纳

今晚以盃賽賽事為主，阿King偏偏就想講吓英冠獨腳戲狼隊主場鬥列斯聯，因為有好嘢益大家！狼隊上季表現突出，但嚟到今季就無以為繼，踢咗20輪聯賽僅得6勝，主場出戰亦唔掂，近5次主場非和則負；相反列斯聯近6仗作客僅一敗，今場受讓半一嘅列斯聯係咪要捧場先？

（TVB 301周五凌晨3時45分直播）

列斯聯作客成績比主場更好，今季10場作客錄得3勝5和2負，上場作客查爾頓打和0比0，其實列斯聯嗰場贏埋都得，球隊佔盡優勢出現不少埋門鏡頭，但球員把握力差少少，搞到入唔到波，賽後連查爾頓領隊都話球隊唔失波係有運。

列斯聯近6仗作客僅1敗，輸畀昆士柏流浪皆因班主施連奴干預，要求球隊下半場改變戰術，結果對方就係喺下半場射入奠勝嘅一球，賽後列斯聯球迷鬧爆呢位班主，睇怕知衰嘅施連奴都唔敢再搞搞震。

狼隊有鋒將洛哈迪高同施古達臣因傷缺陣，22歲射手阿科比獨力難支，球隊近3次主場全和波並僅入1球，今場仲要讓半一，識揀梗係揀列斯聯下盤！
維拉利爾「-1」大反擊

跟住搵嚟兩場西班牙盃第4圈次回合賽事過關，先係馬德里體育會主場對丙組球隊雷烏斯，馬體會近期氣勢如虹，豪取8連勝，當中包括喺首回合以2比1擊敗雷烏斯，晉級形勢大好，今場可以嘆慢板，熱捧半場細！

另一場維拉利爾主場迎戰乙組仔侯爾斯卡，「黃色潛艇」首回合作客爆冷以2比3輸波，今場為出線冇得留力，球隊啱啱喺西甲擊敗皇家馬德里，士氣大振，要讓球主勝！