巴塞勁爆登場炒起FC廣州

猪拉多纳

「MSN」3缺1夠砌巴西幫

世冠盃4強重頭戲，「地上最強」巴塞隆拿鬥FC廣州（廣州恒大淘寶）。兩隊級數擺明有一大段距離，而且歐洲代表喺呢個盃首戰向來搶韁，近7屆準決賽都起碼淨贏兩粒，其中4屆更大炒3球或以上，巴塞即使「MSN」鋒線3缺1，冇咗養傷嘅尼馬，都炒得起以巴西兵團為首嘅FC廣州。巴塞讓兩球，照捧讓球主勝。

（有線61、64、201、203台周四晚6時30分直播）

巴塞隆拿攻力有幾犀利，已無需多講，淨係1位美斯都足以反轉任何球隊防線，加上仲有蘇亞雷斯、拿傑迪錫、恩尼斯達輔助，唔好話對手係亞洲球隊，就算係歐洲一線勁旅都難以招架，今仗縱有「新比利」尼馬缺陣仍夠殺有餘。
歐洲兵首Show例搶韁

事實上，歐洲兵團出戰世盃冠明顯超班，近8屆有7屆由佢哋捧盃，首仗往往大勝壯聲威，包括上屆皇馬大炒藍十字4蛋，巴塞2011年首仗亦贏當年亞冠盃得主艾薩德4球。就算意甲國際米蘭喺2010年都以3比0輕取FC城南，可見歐洲豪門對實力低一班對手，唔會留情。由於FC廣州由名帥史高拉利執教，加上擁有荷西保連奴及羅賓奴等巴西兵，名氣夠響，更加令巴塞有所警惕，相信會出真功夫盡數對手，以免夜長夢多。
恒大土炮防線頂唔住

FC廣州喺亞洲也文也武，但去到國際舞台變得平平無奇，上仗半準決賽對中北美洲冠軍CF阿美利加，踢到補時入波先驚險反勝2比1晉級。雖然呢支中超豪門擁有列卡度高拉特、艾傑臣等進攻好手，但面對巴塞估計球隊會主守，呢班森巴兵恐怕英雄無用武之地。FC廣州防線靠土炮支撐大局，抵擋唔住巴塞侵襲，重蹈2013吞拜仁慕尼黑3蛋或以上絕對唔奇。