侯城反彈1.73倍主W掃雷

猪拉多纳

今晚歐洲賽場多為盃賽，但阿King就睇中咗場英冠獨腳戲，就係侯城主場對雷丁。侯城早前曾陷入低潮，但球隊上仗聯賽贏波成功止跌，今仗主場面對聯賽三連敗兼且作客腳軟嘅雷丁，阿King睇好侯城可乘勝追擊，1.73倍主W值得支持。

（TVB 301周四凌晨3時45分直播）

今季由英超降落英冠嘅侯城，開季一直排喺前列位置，更一度進駐榜首。不過自上月尾後就陷入低潮，喺聯賽先後不敵打比郡同列斯聯，英聯盃亦畀曼城大炒出局，主帥布魯士亦對球隊演出有微言。

侯城上周主場面對「英冠亞視」保頓終於重拾勝軌，球員信心同士氣返晒嚟，今仗縱有前鋒艾保靴南迪斯續因傷缺陣，但馬隆尼同迪奧文迪都已傷愈，配合狀態唔錯嘅艾卡邦，主場對弱旅有望再贏一場。

雷丁近況麻麻，隊波近9場只係贏過保頓，結果主帥奇勒喺輸畀昆士柏流浪之後被炒，上仗開始由代主帥馬田庫爾領軍，但表現未見起色，最終輸畀普雷斯頓後遭逢3連敗，作客更連輸4仗，今仗造訪侯城續有中場謝希保拿同史堤芬昆尼因傷缺陣，相信難望有好成績，阿King都係睇好侯城可以喺主場贏波。
勝利勢頹讓唔起光輝

另外過關推介，澳職墨爾本勝利作客珀斯光輝，墨爾本勝利連續兩仗作客都輸波，今場仲有前鋒艾奇湯臣同守將尼高拉斯安素續抖，讓唔起主隊珀斯光輝，捧「讓球主勝」。（周三晚6時開賽）最後英足盃第二圈重賽，英乙杜根咸級別雖較高，但喺主場都搞唔掂非聯賽球隊FC懷特豪克，今仗重賽不宜高估；兩隊近期上半場都少入波，一於捧半場和。

（周四凌晨3時45分開賽）