拜仁讓主贏「特」

猪拉多纳

傷兵滿營一樣夠殺

出爐德甲半程冠軍拜仁慕尼黑，今晚會喺德國盃第3圈面對達斯泰特，咪以為達斯泰特弱雞，拜仁就會放軟手腳，事關呢支德盃史上最成功球隊，家陣傷兵滿營，主帥哥迪奧拿根本冇本錢玩輪玩，預計佢會焗派羅拔利雲度夫斯基同湯馬士梅拿等球星落場，橫睇掂睇達斯泰特都唔係佢哋手腳，呢鋪讓兩球都照捧1.65倍「讓球主勝」。

（無綫翡翠台及TVB13周三凌晨3:30直播）

拜仁個十字軍名單水蛇春咁長，除咗列貝利同馬里奧葛斯兩名長期傷兵之外，洛賓、祖安巴尼特、阿拉巴、貝拿迪亞等人都養緊傷，杜格拉斯哥斯達亦都上陣成疑，搞到哥帥近3場德甲都塞唔晒個後備名單。可以預期佢老人家根本冇得揀，今鋪焗派強陣冇得玩輪換。
羅拔仔弗到漏油

佢哋上場聯賽淨勝恩高斯達特兩粒，不過贏得毫無霸氣，體育總監森馬賽後省到隊波立立令，揚言唔可以用多傷兵做藉口，相信一眾戰將實會加多兩錢肉緊。「羅拔仔」繼續入球停不了，歐聯連德甲近2場狂轟3粒，配合埋湯馬士梅拿同京士利高文等高質「士哥拿」，火力絕對有保證。
達斯泰特近況曳

對家達斯泰特喺上圈德盃淘汰漢諾威，但自從呢場波之後，佢哋打落6場波只係贏得1場咁大把，上輪聯賽仲喺自己地頭狂吞哈化柏林4蛋添。雪上加霜嘅係，中場伊華拿同守將法比安賀蘭特分別因為膝部同鼠蹊受傷唔出得，進攻中場真羅辛度又喺上場聯賽打柴，殘陣加上頹勢，今鋪想輸少球都難。