QPR迎白禮頓再追半和

猪拉多纳

英冠開快車，矚目戰當然係榜首嘅白禮頓作客有新帥哈索賓基帶領嘅昆士柏流浪（QPR）。英冠已經踢咗廿輪，白禮頓係唯一不敗球隊，取得11勝9和，但佢哋主要勝仗都係喺主場取得，相反近7場作客和咗6場，今場即使對住排第13嘅QPR都冇乜優勢。QPR連續11場開出半場和，咁鬼死旺，一於再追1.87倍半場和！

（TVB 301周三凌晨3時45分直播）
哈索賓基畀球員回氣

QPR上場喺主場同前列分子般尼打和0比0，係前車路士前鋒哈索賓基首次領軍，球員按哈帥指示，一開波踢壓迫性快速打法，壓到般尼有氣冇碇抖，不過呢個打法嘅代價係QPR班球員去到下半場莫氣，般尼攞番主導權，好彩嘅係QPR守得到，最終保住不敗。QPR抖咗3日就要再鬥白禮頓，相信哈索賓基會作出調整，避免上半場就「Chur」盡球員嘅體力，對住近排功力不俗嘅白禮頓穩陣行先，去到下半場先發力都唔遲。

白禮頓主場戰績彪炳，但作客成績就麻麻，今季10場作客錄得3勝7和，最近7場作客和咗6場，當中6場都開半場和，遇着近11場都開出半場和嘅QPR，睇怕再開半場和嘅機會都好大。