拉素森多累鬥累獻細

猪拉多纳

今晚除咗有英超外，意甲都有場獨腳戲，由拉素喺主場對森多利亞。拉素近況低沉，球隊近6場意甲只係和過1場，今仗就算有主場之利都信唔過。不過，對手森多利亞近4場輸晒狀態更差，今仗作客更加唔會貿然搶攻，阿King估計今場入波唔會多，一於捧細盤。

（TVB 301周二凌晨3時45分直播）

拉素上輪聯賽喺主場以0比2不敵祖雲達斯，最近6場意甲賽事只係攞得1分，狀態認真麻麻，難怪有球迷運10袋動物糞便圍攻練習場示威。拉素主帥皮奧利近期被辭退呼聲極高，盛傳接任人選嘅納比上場聯賽亦係座上客，可見空穴來風未必無因。拉素今仗仍有中場莫利、奧根耶奧拿斯、守將魯歷與迪維積養傷唔踢得，另一後衞梅里斯奧山度士就停賽，兵源緊絀下就算有主場之利都難言惡。森多利亞近況比拉素仲差，連續6場賽事未贏過，更錄得4連敗嘅劣績，相信唔會咁容易就扭轉到頹勢。阿King估計今場入波唔多，推介細盤畀大家。
葡超科大吼和好路

另外，德乙比勒費爾德雖有中場古治同賓克文因傷唔踢得，但佢哋主場對住聖保利特別有計，4次交手都保不敗，撐比勒費爾德平手盤啱數。至於葡超嘅科英布拉大學近6仗有5場打和，今仗對手比蘭倫斯已經連續4場冇波入，雙方近四次交手都係打和，不妨再追多鋪和波。

（周二凌晨4時開賽、馬會網上文字直播）