一W即掂燕豪芬坐定粒陸

猪拉多纳

B組另一場關鍵戰，荷甲班霸燕豪芬（PSV）主場火併已經出局嘅俄超一哥莫斯科中央陸軍，PSV只要贏波就肯定出線，毋須理會同組禾夫斯堡對曼聯嘅賽果，撞正中央陸軍大跌Watt，近6場正式比賽輸咗5仗，PSV勢必趁機打落水狗，主W不容錯過。

（有線62及202台周三凌晨3時45分直播）

PSV今屆重返歐聯戰場表現唔錯，兩鬥曼聯取得1勝1和更加係代表作，其中上輪作客竟能攻到紅魔氣咳，最終互交白卷堅唔抵，雖然PSV分別落後禾夫斯堡同曼聯2分及1分，但由於後兩者今輪正面交鋒，必定有一隊擸唔晒3分，因此PSV只要今仗擊敗中央陸軍，就肯定取得出線資格，目標鮮明。況且PSV近況弗爆，連續9場未輸過之餘，當中仲贏咗7仗，絕對有本錢再斬中央陸軍，日前佢哋聯賽作客維迪斯，去到完場前一刻先由隊長盧克迪莊助攻畀祖列軒迪歷斯奠勝，擺明行運一條龍。
中央陸軍近況曳爆

講到PSV行運，就不得不提季初好弗嘅對手中央陸軍，自上月開始大跌Watt，連續6場正式賽事不勝，仲輸咗5仗曳到爆，開咧頻頻建功嘅前線尖刀杜姆比亞，自10月尾後便陷入球荒，另一前鋒阿密特穆沙更長期「隱形」，令中央陸軍直插谷底，難怪於歐聯提早出局。

PSV依家遇上呢支落難俄超一哥，真係行運行到落腳趾尾，唔贏對唔住自己，斯維大吉利是講句，如果PSV今仗輸波，唔單止出線無望，連「降格」踢歐霸嘅資格都冇埋，為免「雙失」梗係贏咗先算喇，加上PSV戰意十足，就算守將辛迪亞高阿里亞斯停賽亦冇有怕，主W乃不二之選。