拿玻里國米精打細算

猪拉多纳

榜首雙雄「守」出頭

意甲榜首大戰，「二哥」拿玻里主場硬撼榜首國際米蘭，兩隊都狀態大勇，拿玻里近8場聯賽贏足7場，國米亦取得聯賽4連勝，最犀利係兩隊都失波極少，今場大戰預料雙方都會穩陣行先，2倍入球細捧得過。

（TVB 301周二凌晨4時直播）

國米今季以防守足球高踞意甲榜首，13戰僅失7球，其中有10場開細盤，但呢個踢法就惹來傳奇教頭沙基不滿，佢日前批評國米踢法過時難睇，毫無藝術性可言，球員喺場上變成一班踢波機器。不過現實就係咁，依家足壇着重成績同獎盃，車路士就係靠「泊大巴」贏得英超冠軍，對於已失落咗5季聯賽冠軍嘅國米嚟講，贏得冠軍、攞到下季歐聯席位先係最重要。國米近4場全勝一球不失，有3場係贏1比0，總之就係「三分已袋，理鬼得你」。今場作客拿玻里，梗係繼續守落去，但求保住榜首位置。

拿玻里落後國米2分，贏波就可以爬頭做「1哥」，不過拿玻里又係一擔擔，踢法以守為主，已經連續7場零失球，今場贏到當然最好，但「6分波」輸咗就會畀國米拉開領先優勢，主場出擊都未必敢冒進，2倍嘅細盤冇走雞呀！
薩斯索羅受讓有揸「拿」

另一場意甲賽事，「3哥」費倫天拿作客薩斯索羅，薩斯索羅主場夠晒硬淨，今季聯賽主場未輸過，最近3仗主場更贏晒，當中對手包括祖雲達斯同拉素，費倫天拿想贏唔易，讓平半有啲牙煙，薩斯索羅主場受讓值得捧場。

（TVB 301周二凌晨2時直播）