達斯泰特先求穩半場和啱數

猪拉多纳

德甲獨腳戲達斯泰特主場對科隆，升班球隊達斯泰特經過季初神奇開局後近況回落，今仗賽前聲言先做好防務以穩為先，遇上近期鋒線嚴重啞火嘅科隆，預期係一場拉鋸戰，入波唔會多，但細盤只得1.57倍相當乏味，黑柴寧揀1.92倍半場和。

（now 670、有線61及201台周六凌晨3時30分直播）

達斯泰特規模同財力都十分有限，主場只可以容納17,000球迷，而且設施相當陳舊，連名宿馬圖斯都話，佢哋個球場同25年前一樣，冇乜改進。不過佢哋升班後演出令人眼前一亮，頭7場聯賽只逢一敗，贏佢哋嘅仲只係班霸拜仁慕尼黑，一度喺積分榜上排喺上半版。

達斯泰特憑嚴密組織、勤力互相補位同超強罰球戰術攞過唔少甜頭。佢哋罰球戰術多變，今季踢咗13場聯賽，單憑罰球已經製造咗6個入球，仲未計另1球12碼。

不過，達斯泰特始終限於兵源同質素，同一套戰術反覆咁用，已經畀其他球隊睇通，近績已見下滑，近4場聯賽僅得1分，而且近3仗對手都唔強，球隊已開始有危機感，教練舒侯斯達賽前講明，現時要先做好防務止血，主場亦唔會貪心搶攻。
科隆把握力不足

科隆走勢同達斯泰特近似，季初曾經係威係勢，但近期重歸平淡，尤其前線交唔到貨，近5場聯賽竟然有4場冇波入，鋒將西蒙祖拿同大迫勇也把握機會能力不足，首席射手莫迪斯迪又鬧緊入球荒，作客上半場要撕破主守嘅達斯泰特防線並唔容易。