巴塞MSN齊章博主主

猪拉多纳

巴塞隆拿喺歐聯E組一枝獨秀，今晚喺魯營球場砌低羅馬，即可篤定以小組「一哥」身份、連續第12年躋身淘汰賽階段。呢支西甲班霸剛啱揚威「國家打吡」，「球王」美斯今晚亦會自兩個月嚟首度擔正，相信佢哋好大機會由頭贏到尾，1.58倍「主主」放心捧啦！

（有線62、202及中央5台周三凌晨3:45直播）

家陣喺E組揸住10分嘅巴塞，今鋪攞1分夠出線，不過佢哋呢輪遇神殺神，羅馬想唔輸都幾難！喺美斯缺陣期間，尼馬同蘇亞雷斯合力為球隊貢獻咗22球、10個助攻，「國家打吡」大炒皇馬4蛋一役，有3球係關「SN」事，如今有埋美斯壓陣，巴塞鋒力肯定更癲。嚟緊巴塞賽程緊密，西甲、西盃加埋世冠盃，教練安歷基希望盡快操番起美斯嘅狀態，可預期呢位「球王」今晚有大把表演機會。
羅馬3件鋒將打柴

由於早前嘅巴黎恐襲，西班牙XX對呢場波好緊張，除咗話會加強警力之外，又再次呼籲球迷咪孭背囊入魯營，並勒令巴塞喺開波前將博物館同專賣店落閘，氣氛都幾緊張。

作客嘅羅馬同樣令人擔心，3位攻擊球員穆罕默德沙拿、謝雲奴同托迪繼續養傷，加埋佢哋剛啱喺意甲失分畀博洛尼亞，狀態似乎麻麻，既然連皇馬都要輸鑊勁畀巴塞，羅馬睇怕都難逃一劫，隨時晨咁早就頂唔住巴塞嘅進襲。