哥倫比亞 阿根廷啞火捱「細」界

猪拉多纳

阿根廷呢排黑氣纏身，早排已經冇咗美斯、阿古路同泰維斯呢3大箭頭，點知個天好似存心同佢哋過唔去咁，繼續有戰將加入十字軍，射手希古恩踢完上仗後仲傷埋。家陣呢隻「潘帕斯殘鷹」喺南美區世盃外圍賽，造訪同樣受傷停困擾嘅哥倫比亞，大家都缺乏駁火架生，1.5倍入球細抵玩。

（開賽時間：周三凌晨4:30）
阿根廷4大射手倦勤

阿根廷冇咗3大前鋒後，上仗僅賽和巴西1:1，搶到1分算有交代，佢哋賽後喺分組賽3戰不勝、拎住2分排尾二，想出線真係不容再失。雪上加霜嘅係，射手希古恩踢完上仗後足踝有傷，好大機會倦勤，計埋中場拉美拿、柏斯托尼、馬斯真蘭奴全部都唔掂，右閘朗卡尼亞仲坐波監添，至少8件主力唔踢得，陣容天殘地缺，主帥馬天奴就算想同哥倫比亞駁火亦冇晒計。
哥倫比亞僅靠J神攻堅

另邊廂嘅哥倫比亞亦唔好得去邊，前鋒積臣馬天尼斯上場鬥智利後宣告打柴，聯同中場古亞達度、卡路士山齊士、後衞辛迪亞高阿里亞斯3件停賽，實力大減。況且班波近況麻麻，近4戰僅得1勝，兼入得4粒，單靠中場占士洛迪古斯復出攻堅，都好難整場入球騷益街坊。

值得留意嘅係，今仗比賽地點巴蘭基亞天氣炎熱，據講比賽期間氣溫或高達攝氏40度。殘陣再加埋酷熱天氣，睇怕雙方都幾難發揮應有實力，入球細怕且都走唔甩咯。