法德玩試陣「細」所難免

猪拉多纳

今晚咁多場熱身賽中，以法國主場鬥德國最矚目。「高盧雞軍團」喺嚟緊歐國盃決賽周揭幕戰場地法國國家體育場擺陣，不過兩大進攻主力缺陣，兼且「日耳曼兵團」亦有多名星級球員落選，睇怕唔慌多波入得去邊，撐1.75倍入球細。

（開賽時間：周六凌晨4:00）
迪甘斯游說列貝利復出

自從「刀疤殺手」列貝利上年8月宣布退出國家隊後，法國主帥迪甘斯隨即對賓施馬同華布拿委以重任，由佢哋孭起進攻重責。好衰唔衰呢對高盧雞孖寶近排捲入「性愛影片勒索案」，搞到今仗雙雙落選。迪帥似乎擔心案件會隨時影響兩人出戰來年歐國盃決賽周嘅機會，所以近日積極游說列貝利復出，睇得出迪帥對其他嘅進攻球員如基奧特等人冇乜信心，今仗仲點益大盤客先？
重召老將馬里奧高美斯

對手德國同樣有主力落選，翼鋒馬里奧葛斯、馬高列奧斯打柴，領隊勒夫仲畀中場核心奧斯爾、卻奧斯放假免役，但就重召番30歲中鋒馬里奧高美斯，仲首次搵嚟巴黎聖日耳門門將奇雲查普、史浩克中場利萊辛尼入伍，擺明試陣居多。既然兩軍火力同樣有所下降，細盤可期。