波斯尼亞主場頭炮打得響

猪拉多纳

歐國盃附加賽首回合今晚繼續上演，波斯尼亞會喺主場惡鬥愛爾蘭。波斯尼亞主場表現向來唔錯，近3次主場更加係贏晒，今仗有硬朗中場比錫刑滿復出，加上主力如迪斯高、比真歷等皆在陣，對住有後場及前線兩大主力停賽嘅愛爾蘭，今仗有望先拔頭籌，阿謙推介波斯尼亞主勝。

（有線61及64台周六凌晨3時45分直播）

波斯尼亞喺歐國盃外圍賽畀比利時同威爾斯壓住，只能以第3名踢附加賽爭奪決賽周入場券，但球隊近況其實唔錯，已經連續3場贏波；再加上波斯尼亞主場表現亦有保證，近4次主場賽事錄得3勝1和，今仗主場出擊可謂信心十足。波斯尼亞喺今次附加賽精銳盡出，門將比高域、中場比真歷同射手迪斯高皆有入選，而中場悍將比錫啱啱坐完波監復出，陣容強勁絕對有望旗開得勝。
奧沙停賽 愛爾蘭頭痕

愛爾蘭喺歐國盃外圍賽出線形勢本來唔錯，可惜最後一仗輸咗畀波蘭，令球隊只能以第3名身份轉戰附加賽。更不幸係愛爾蘭隊長奧沙對波蘭一役，於補時階段攞紅牌被逐，今仗同前鋒約拿芬禾達斯齊齊停賽。愛爾蘭前線雖然仲有美職雙雄羅比堅尼同奇雲杜里在陣，約拿芬禾達斯嘅缺陣影響唔算太大，但後防冇咗奧沙只能靠維拉中堅施安奇勒夥拍打吡郡嘅基奧治，未必頂得住波斯尼亞射手迪斯高，今仗仲要作客睇怕凶多吉少。