比利時星級班底打沉意國

猪拉多纳

新鮮出爐「世界一哥」比利時主場對意大利，屬於紀念「希素球場慘劇」30周年活動，比賽場地正係由希素球場改建而成。比利時近年人才輩出，進身一線勁旅行列，今個月更力壓世盃冠軍德國，歷史性榮登世界一哥，氣勢一時無兩。反觀傳統強隊意大利人才凋零，領隊干地今次冇徵召兩位中場大佬派路及迪羅斯，明顯想趁機提拔新人接班，試陣味濃，捧比利時主W穩陣。

（now 633周六凌晨3時45分直播）

比利時現時粒粒皆星，鋒線賓迪基、盧卡古，中場夏薩特、奇雲迪布尼，後防高柏尼、維頓漢，以至門將米洛列特，全部效力英超豪門。即使費蘭尼、泰拔高圖爾斯因傷缺陣，三線人腳仍然非常強大，最難得係呢班球員夠年輕有潛力，絕對有力問鼎明年歐國盃冠軍寶座。比利時領隊韋莫斯已建立固定班底，唔需要刻意試陣，今仗可迅速入局。
意大利鋒線冇人孭飛

意大利自巴洛迪利沉淪後星味急跌，今次連派路及迪羅斯都冇入選，陣中唯一稱得上球星得番門將保方。事實上，意國近年青黃不接，鋒線最大希望竟然係「外援」艾達馬田斯，呢位巴西裔射手雖然喺今季意甲已轟入9球，但級數同比利時眾星有距離。領隊干地今次召入多位邊緣國腳，包括加比亞甸尼、邦拿雲度拉、法蘭斯高阿沙比等人，明顯對常規國腳未滿意，希望觀察多幾位球員，試陣為前提下，鬥唔贏如日中天嘅比利時。