恩高斯達特 再追半場和

猪拉多纳

德甲獨腳戲科隆主場鬥恩高斯達特，兩軍今季演出同成績都比預期好，尤其首次升上德甲嘅恩高斯達特，憑頑強防守表現超穩定，球員拚搏精神可嘉，係一支極難纏嘅新軍，有氣有力時好難有球隊可以攻陷佢哋，今季踢咗6場聯賽，半場比數全部都係0比0，今晚作客對科隆相信都會繼續以穩為先，投X首選再追有2倍分頭嘅半場和。

（now 670、有線61及201台周六凌晨2時30分直播）
爛頭卒多防線超硬淨

恩高斯達特以上季德乙冠軍身份初升德甲，教練夏辛侯爾收起上季強攻踢法先求穩守，今季表現最出色嘅係30歲巴西防守中場羅渣比拿度，佢跑動多踢法超硬淨，喺中場包辦大量掃蕩工作，後防大佬係德國喀麥隆混血兒麥迪比，佢係史浩克中堅祖爾麥迪比嘅哥哥，助攻能力冇細佬咁強，但防守更加穩陣，加埋演出神勇嘅門將拉馬辛奧斯簡同積極補位嘅中堅班捷文胡比拿，呢班爛頭卒技術一般但組織嚴密紀律性強，今季6場聯賽對手包括多蒙特同禾夫斯堡等勁旅，喺上半場佢哋有氣有力時一樣難越雷池半步。

恩高斯達特周中主場力拚漢堡，全場形勢稍佔優，可惜末段畀對手罰球偷襲成功，不過目前以10分排第8位已經比預期更好，今仗問題係經驗較淺未習慣快車賽程，擔心後勁不繼。
科隆鋒力增兼顧和主

科隆目前同樣得10分，憑入波較多排緊第7位，不過周中作客淨吞哈化柏林兩蛋，顯示實力只值中游，球隊踢法同樣謀定後動，今季9個聯賽入球只有兩個係上半場取得，今晚半場好難咬得客軍入，但今季中前場增兵後鋒力提升，到下半場有望趁對手力弱時制勝，半全場和主有4.5倍值得兼顧。