紅魔客W等修錢

猪拉多纳

今晚英超重頭戲，上周中剛喺歐聯輸波嘅曼聯作客硬撼「聖人」修咸頓。紅魔有隊長朗尼傷愈復出嘅好消息，加上新加盟嘅法國防中舒尼達連上季正係修咸頓嘅鐵打主力，今仗倒戈自然會向主帥尹戈爾提供大量有用情報，更何況紅魔最近7次造訪修咸頓嘅聖馬利球場「福地」不但未輸過，仲贏咗其中6場，仲唔係贏波反彈好時機？客W值得支持。

（now 621周日晚11時直播）
歐聯失利搶Ｗ「還魂」

曼聯隊長朗尼一向係萬能老倌，中前場任何位置都能勝任，只係予人周身刀冇張利嘅感覺，因此主帥尹戈爾決定讓佢固定喺中鋒位，同樣惹來唔少爭議。一來朗尼傷患漸多，二來佢已經跨季連續10場聯賽冇士哥，用一個唔識入波嘅球員重新出任中鋒，尹戈爾嘅「創新思維」慘遭寸爆，有網民更以「朗尼保持清白之身」嚟揶揄佢。

適逢朗尼受傷，上周「雙紅會」後備入替建功贏利物浦嘅新加盟前鋒安東尼馬迪爾搶盡風頭，可惜上周中歐聯作客反輸畀燕豪芬1比2之役，呢位「新亨利」擔正卻完全冇料到。好彩尹帥賽前確認朗尼已好番可正選披甲，並希望呢位愛將可在退役前壓倒名宿卜比查爾頓，成為曼聯史上士哥王，查實朗尼喺月頭先力壓卜比Sir，榮膺英格蘭國家隊史上最佳射手。睇番「魔童」喺曼聯累積233球，僅落後卜比Sir（249球）同丹尼士羅（237球）位列第3，依家紅魔極需要喺歐聯新敗後立即贏番場「還魂波」提振士氣，朗尼身為隊長，必定加多兩錢肉緊，以破聯賽入球荒嚟回報尹帥嘅信任。
修咸頓主場冇運行

另一邊廂，上季表現突出嘅修咸頓，開咧後於聯賽贏得一場咁大把，右閘尼達利基尼及防中舒尼達連離隊後，明顯對球隊實力有影響，今仗續有科連加度斯、佐迪卡斯、積洛迪古斯因傷缺陣，戰鬥力再跌兩成。「聖人」雖然上季作客奧脫福球場贏過紅魔，但佢哋近年於聖馬利球場恭候曼聯都冇好下場，近7次交手僅錄1和6負劣績，堪稱「主場不利」，撞正上周中歐聯輸波而急於反彈嘅曼聯注定凶多吉少，客W有2.22倍，認真值博！