瑞典伊巴謙帶傷冷敲奧地利

猪拉多纳

歐國盃外圍賽G組上演榜首大戰，由「二哥」瑞典主場迎戰奧地利，向來被視為歐洲3線球隊嘅奧地利，今屆賽事令人眼前一亮，相反瑞典上場輸畀俄羅斯後，第2名位置都危危乎，最慘係王牌射手伊巴謙莫域受傷上陣成疑，正所謂寧買當頭起，今場不妨冷敲3.3倍客勝。

（有線64及203周三凌晨2:45直播）
「瑞典殺手」阿拉巴在陣

奧地利積弱多年，不過今屆人腳並唔失禮，包括鋒將夏歷、中場阿拿奧杜域、後衞基斯甸富治斯都喺頂級聯賽立足，仲要有拜仁球星阿拉巴傷愈，實力更見完整。值得留意係，阿拉巴對上3次鬥瑞典2度入波，可以話係「瑞典殺手」，信心十足，作客瑞典隨時反客為主添。

瑞典近年面對青黃不接危機，僅靠射手伊巴謙莫域單天保至尊，上場作客俄羅斯輸0:1一仗，呢位「戰神」更因為背傷被迫提早退下火線，今場披甲機會唔大，就算頂硬上都未必有最好狀態，令鋒力大打折扣。何況兩隊近3次交手都係由奧地利先開紀錄，證明佢哋特別有計攻破瑞典防線，今場隨時再次帶嚟驚喜。