俄羅斯瑞典形細好

猪拉多纳

歐國外G組，力爭直接出線嘅「三哥」俄羅斯主場迎戰排第二嘅瑞典。俄羅斯火力弱，撞正喺外圍賽表現硬淨嘅瑞典，捧入球細啱數。
（有線64及203台周日凌晨零時直播）
俄羅斯正式踏入「後卡比路時代」，由現任莫斯科中央陸軍教頭史盧斯基暫任看守領隊，由於要球會、國家隊兩邊走，今次首度領軍嘅史盧斯基能否有足夠時間備戰成為疑問。撇除今年3月因球迷騷亂腰斬比賽、獲歐洲足協判作客贏黑山3比0一戰，俄羅斯喺G組僅從弱旅列支敦士登身上獲得一場「正式勝利」，其餘主客兩鬥奧地利皆輸0比1、主場鬥摩爾多瓦亦僅和1比1，攻力疲弱冇本錢爭勝。
伊巴剛傷愈唔夠弗
自2011年不敵匈牙利後，瑞典對上9場歐國外未輸過，表現勁硬淨。不過，瑞典目前攻力有隱憂，中場指揮官卡斯唐今仗要坐波監，頭號射手巴黎聖日耳門王牌伊巴謙莫域亦只係傷愈不久，上周法甲正選落場起碼錯失兩個黃金「餐士」，狀態明顯不足，遇上攻力同樣極曳嘅俄羅斯，開細盤居多。