歐霸瑞士打吡吼半和

猪拉多纳

歐霸盃外圍賽第3圈今晚會上演多場首回合賽事，阿King睇中咗場「瑞士打吡」，由瑞士超排第4嘅杜安喺主場迎戰排第9嘅華杜斯。兩隊近年喺聯賽成日交手，所以都已經摸清對手嘅實力，今仗只係首回合賽事，相信兩軍都唔會亂咁搶攻，阿King捧半場和。（周五凌晨1時30分開賽）
杜安華杜斯熟晒路

今屆有3支瑞士球隊殺入歐霸盃外圍賽第3圈賽事，除咗杜安同華杜斯外，仲有蘇黎世。講番杜安對華杜斯呢場波，杜安陣中最具名氣嘅相信係主帥史科沙，呢位曾經踢過國際米蘭同拜仁慕尼黑嘅瑞士國家隊隊長，球員時代係中場指揮官，踢法瀟灑且傳送獨到，所以杜安都係以地面進攻為主。杜安今仗只有中場施爾高菲德及尼高拿蘇達無法上陣，上仗聯賽有波入嘅史特加借將馬高洛查士將肩負入球重責。

華杜斯其實係列支敦士登球隊，但就參加瑞士超賽事，陣中球員大多係名不見經傳，而且仲係聯合國兵團。華杜斯喺瑞士超首兩場賽事都贏唔到，但對手係巴素利及蘇黎世呢啲強隊，今仗面對杜安相信唔會咁難踢。雖然杜安近7次對華杜斯都唔使輸仲贏咗其中5場，但今仗始終係首回合賽事，相信兩軍都唔會踢得太進取，而且兩隊對上一場聯賽都開半場和，今仗大有可能再開出呢個戰果。