牙買加上力重擊加拿大

猪拉多纳

至於另一場B組賽事，由牙買加喺美國德州迎戰東道主之一嘅加拿大。牙買加分組賽首戰同哥斯達黎加打成2比2平手，球隊入球能力似乎唔錯，面對首戰未能取得入球嘅加拿大，相信有力打開勝門，阿謙睇好牙買加可以順利贏波，捧主Ｗ。（周日早上6時30分開賽、馬會網上文字直播）
加拿大得二線兵頂檔

牙買加首戰以2比2打和哥斯達黎加，總算終止喺美洲國家盃分組賽3戰全敗出局後嘅頹勢。牙買加陣中唔少球員都喺英超同英冠打滾，好似上仗有波入嘅雷丁中場麥奇利同奧連特中場麥安拿夫，加上李斯特城後衞韋斯摩根同水晶宮後衞馬里亞柏，整體其實唔太差，難怪教練舒哈化表示球隊上仗表現相當出色，而且是賽事中實力最強嘅隊伍之一，有信心奪冠而回，相信今仗一定會全力爭勝。

東道主之一嘅加拿大首戰只能以0比0打和薩爾瓦多，未能打響頭炮，陣中較大名氣嘅球員好似波特蘭伐木者中場韋爾莊臣、蒙特利爾衝擊中場貝尼亞及韋斯咸後衞當尼爾亨利都冇歸隊踢今屆賽事，只靠拉科B隊中場森美爾比亞迪、清水心跳後衞迪積贊高域同伯明翰後衞大衞艾格支撐大局，球隊實力自然大減。加拿大上仗未能喺同組最弱嘅薩爾瓦多身上攞到入球，證明攻力麻麻，面對早前踢完美洲國家盃上晒力嘅牙買加，估計凶多吉少。